Monday, May 19, 2014

പത്തു മൈല്‍ നടത്തം - ഒരു ഒന്നൊന്നര നടത്തം

സിബി മൂന്നാറിന്റെയും മനോജ്‌ നിരക്ഷരന്‍ ചേട്ടന്റെയും കൂടെ നടന്ന പത്തു പതിനാറു കിലോമീറ്റര്‍ , അതാണ്‌ നമ്മുടെ കഥ നായിക . ആ പത്തു മൈല്‍ ദൂരത്തെ കാഴ്ചകള്‍ക്ക് എന്റെ പേപ്പറില്‍ ഞാന്‍ പകര്‍ന്ന വര്‍ണങ്ങള്‍ .
അവയുടെ ഓര്‍മകളിലൂടെ പേപ്പറും പേനയും പെന്‍സിലും കയ്യിലെടുത്ത് ഒരു പുനര്‍ വായന .. 


moonnar

അന്ന് കണ്ട തൂക്കുപാലം , ആടിയാടി ആശാന്‍ ഞങ്ങള്‍ക്ക് മുന്നില്‍ .. ഞങ്ങളും വിട്ടു കൊടുത്തില്ല.. പൂശി ഒരു പത്തു നൂറു ഫോട്ടോ.. എന്നിട്ടും ആശാന് യാതൊരു കുലുക്കവും കണ്ടില്ല, ഇതൊക്കെ എത്ര കണ്ടതാ എന്നാ ഭാവം...! ഇളിഭ്യരായ ഞങ്ങള്‍ പിന്നെ അവിടെ നിന്നില്ല ..

ഒരൊറ്റ നടത്തം അങ്ങ് വെച്ച് കൊടുത്തു .. ഹല്ലേ, ഇങ്ങനെയും ഉണ്ടോ ..!


moonnar

നീണ്ടു പരന്നു ഉരുണ്ടു മറിഞ്ഞു കളിച്ചു ഭൂമി ഒരു പരുവത്തില്‍ കയറ്റമായും ഇറക്കമായും മുന്നില്‍ അങ്ങനെ വന്നു പോയി . സ്വന്തം മക്കള്‍ നെഞ്ചില്‍ കുത്തി കേറ്റിയ കത്തി എടുക്കാന്‍ പോലും മെനക്കെടാതെ .. അവര്‍ ചെയ്ത പാപങ്ങള്‍ ഏറ്റു വാങ്ങി ഇതൊക്കെ എന്ത് എന്നാ മട്ടില്‍ . അതിനു മുന്നില്‍ ഞങ്ങള്‍ റോഡരികില്‍ കണ്ട ശ്മശാനങ്ങള്‍ ഒക്കെ എവിടെ കിടക്കുന്നു ..
ഒരു പ്രേത സിനിമയുടെ ലൊക്കേഷന്‍ പോലെ തോന്നിച്ചു , നല്ല ഭീകരത ...! 

moonnar

നടത്തത്തിന്റെ വേഗത കൂടുന്നു വിയര്‍ക്കാന്‍ തുടങ്ങുന്നു , തണുപ്പ് അതിന്റെ പാട് നോക്കി പോയിട്ട് സമയം കുറെ ആയി . ഒരു ചെറിയ പാര്‍ക്കിംഗ് തിരഞ്ഞു മുന്നോട്ടു . ഇടയ്ക്കു കണ്ട തൊഴിലാളികളുടെ വീടുകളില്‍ കുട്ടികള്‍ കലപില ഉണ്ടാക്കുന്നു . അവരുടെ സാമ്രാജ്യം, അവര്‍ ഉണ്ടാക്കട്ടെ  നമ്മള്‍ മിണ്ടാന്‍ പോണ്ട...!

നേരെ നടക്കുക തന്നെ ...വിയര്‍പ്പൊക്കെ എത്ര കണ്ടതാ .. എന്നാലും ഒന്ന് ഇരിക്കാമായിരുന്നു ..!


moonnar

ഫാക്ടറി തൊഴിലാളികളുടെ ചെറിയ ചെറിയ അങ്ങാടികള്‍ , അവിടെ എല്ലാം ഉണ്ട് .. ആസ്പത്രി മുതല്‍ ക്ലബ്‌ വരെ ..

moonnar

അത്തരം ഒരു അങ്ങാടിയില്‍ വണ്ടി നിര്‍ത്തി .. ഞാന്‍ ഉദ്ദേശിച്ചത് കാല്‍ വണ്ടി , അതിനാവുമ്പോ നിര്‍ത്താന്‍ പ്രത്യേകിച്ച് ഒന്നും ചെയ്യാണ്ടിരുന്നാ മതിയല്ലോ . നിര്‍ത്തി ന്നു പറഞ്ഞാലും പോരാ , അവടത്തെ ചായ പീടികയില്‍ കയറി കട്ടന്‍ ചായ , ഇതില്‍ എന്തോ ഒരു മോഹബ്ബത്ത് ഉണ്ടായിരുന്നു , അത് വിശന്നു തളര്‍ന്നു ഇരിക്കുന്നതോണ്ടാണോ എന്നൊന്നും ചോദിക്കെരുത് , ബികോസ് കഥയില്‍ പണ്ടേ ഇല്ലാത്ത കാര്യമാണ് ചോദ്യം ..!
കൂടെ കഴിച്ച വടക്ക് വരെ ഉണ്ടായിരുന്നു മുഹബ്ബത്ത് .. അത് പെരുത്ത്‌ പെരുത്ത് വരുന്നതിനു മുന്‍പേ അവിടെ നിന്ന് കാല്‍ വണ്ടി സ്റ്റാര്‍ട്ട്‌ ചെയ്തു നീങ്ങി.. 
പണി പാളാന്‍ പാടില്ലല്ലോ ...

മൂന്നാറിന്റെ മൊഞ്ചിനു മുന്നില്‍ കാല്‍ വണ്ടി മുഹബ്ബത്ത് മൂത്ത് ഇടയ്ക്കിടയ്ക്ക് ബ്രേക്ക്‌ ഇട്ടു . സിബി ചേട്ടന്‍ ഉടനെ ആക്സിലേറ്റര്‍ ചവിട്ടി സംഗതി ലെവല്‍ ആക്കി ...

 moonnar

കാല്‍ വണ്ടിക്കാര്‍ ഈ മഞ്ഞ വണ്ടി കണ്ടപ്പോ ബ്രേക്ക്‌ ഇട്ടു.. അല്ലെങ്കിലും ഇമ്മാതിരി വണ്ടി കണ്ടാ ആരും ബ്രേക്ക്‌ ഇടും . കുണ്ട മണ്ടി പിടിച്ചൊരു വണ്ടി തന്നെ , ആള് മരുന്നടിക്കാന്‍ വന്നതാണ് , പച്ചപ്പിന്റെ മോളില്‍ കീടങ്ങളായ കീടങ്ങളെ ഒക്കെ , ഞാന്‍ കീടം ആവില്ല എന്ന് തോന്നുന്നു , ഓടിക്കാനുള്ള മരുന്ന് . അത് പിടിച്ചു അടിച്ചു ഓടിക്കാന്‍ അവര്‍ക്ക് ഞങ്ങള്‍ അവസരം കൊടുത്തതെ ഇല്ല . കാല്‍ വണ്ടിയുടെ ആക്സിലറേറ്റര്‍ ആഞ്ഞു ചവിട്ടി .. ഹമ്മോ !!

moonnar

പിന്നെ ഇറക്കം തുടങ്ങി , ഇറക്കത്തിന്റെ അറ്റത്ത് വെള്ളച്ചാട്ടവും .. അല്ലെങ്കിലും ഈ അടുത്തായിട്ടു ക്ലൈമാക്സ്‌ ഒക്കെ അടിപൊളി ആവുന്നുണ്ട് . പക്ഷെ ഇവിടെ ട്വിസ്റ്റ്‌ ഉണ്ട് .. സിബി ചേട്ടന്റെ അടിപൊളി ട്വിസ്റ്റ്‌ ...


moonnar

ആ ട്വിസ്റ്റ്‌ കഥയെ മാറ്റി മറിച്ചു , കൊടും തണുപ്പില്‍ കുളിര്‍ന്നു മലര്‍ന്നു ആ വെള്ളത്തിന്റെ മാരക പീഡനം ഏറ്റു വാങ്ങി അവടെ കിടന്നു . ചില പീഡനങ്ങള്‍ ഭയങ്കര സുഖകരം ആയിരിക്കും എന്ന് മനസ്സിലായോ , ഇല്ലെങ്കി ആക്കിക്കോ .. 
ഞാന്‍ പതുക്കെ പതുക്കെ വെള്ളത്തില്‍ മുങ്ങി പറയാന്‍ ശ്രമിച്ചു .. 
"സിബി ചേട്ടാ .. നന്ദി നന്ദി നന്ദ്രി നന്ദ്രി ...!!"
നടന്നില്ല ,

 ഞാന്‍ വേഗം കുളിച്ചു കയറി സിബി ചേട്ടനെ കണ്ടു പറഞ്ഞു : " സിബി ചേട്ടാ നന്ദി !"
ഹല്ലാ പിന്നെ !!





Tuesday, April 29, 2014

പ്രിയപ്പെട്ട കലാകരാ .. അങ്ങേക്ക് വിട !!




ഒരു വരയിലോ ഒരു വാക്കിലോ പുതിയ കാവ്യത്തിന്റെ പിറവി കണ്ടെത്തിയിരുന്ന അങ്ങ് 
മലയാള ചിത്രകലാ രംഗത്തെ ശൂന്യമാക്കി അരങ്ങൊഴിയുമ്പോള്‍ , ഒരിറ്റു കണ്ണുനീര്‍ അങ്ങേയ്ക്കായ്
സമര്‍പ്പിക്കട്ടെ...!!

അങ്ങ് ചെയ്ത മഹത് സൃഷ്ടികള്‍ക്കുള്ള നന്ദി സൂചകം ആയിട്ടെങ്കിലും ...


ആദരാഞ്ജലികള്‍ എം വി ദേവന്‍ .!!

Monday, April 28, 2014

അബ്ബസ്ക്കാന്റെ ഖുബ്ബൂസിനു ജന്മദിന ആശംസകള്‍ !!



പ്രവാസ ജീവിതത്തിന്റെ കയ്പ്പും മധുരവും കണ്ണീരും കിനാവും ഒരു ഖുബ്ബൂസിലേക്ക് ആവാഹിച്ച 
മാന്ത്രികന്‍ .

അബ്ബസ്ക്കയുടെ ഖുബ്ബൂസ് പ്രവാസികളുടെ ജീവിതത്തെ വരച്ചു വെച്ചപ്പോള്‍ ഒരു പ്രവാസിക്ക് തിരിച്ചു കൊടുക്കാന്‍ കഴിയുന്ന ഒന്ന് , 
തിരിച്ചു വരച്ചു കൊടുക്കുക..!!

ജന്മദിന ആശംസകള്‍ അബ്ബാസ്‌..!!




Wednesday, April 16, 2014

മദീന -2 (മസ്ജിദ് നബവി )


മദീനയിലെത്തുന്ന ഏതൊരു വിശ്വാസിയും തേടുന്ന ഈ ജനതയുടെ അനിഷേധ്യനായ നേതാവ് മുഹമ്മദ്‌ നബി ( സ ) തങ്ങളുടെ റൌള - ഷെരീഫ് ആണ് ഞാനും മദീനയിലെത്തിയ ഉടനെ തിരഞ്ഞത് . 

ആദ്യമായി മസ്ജിദ് നബവിയുടെ  വാതില്‍ കടന്നു അകത്തെത്തിയപ്പോള്‍ ഒരു മുജ്ജന്മ ബന്ധം ഞാന്‍ അവിടെ അനുഭവിച്ചു . 
മദീനയുടെ ഹൃദയത്തിലുറഞ്ഞു കിടക്കുന്ന സ്നേഹത്തിന്റെ ഉറവിടം ഞാന്‍ അവിടെ കണ്ടു .
ശുദ്ധി വരുത്തി അകത്തു കടന്നപ്പോള്‍ ഉള്ളില്‍ ഉണര്‍ന്ന വികാരം , അത് ഞാന്‍ ഇതിനു മുന്പ് അറിഞ്ഞതായിരുന്നില്ല .
പിന്നെ ഞാന്‍ നടന്നത് മറ്റൊരു ലോകത്തിലൂടെ ആയിരുന്നു . ഭക്തിയുടെ പാരമ്യത്തില്‍ തങ്ങളുടെ നേതാവിന്റെ അടുത്ത് വന്നു വികാര വിക്ഷോഭങ്ങളെ പങ്കു വെക്കുന്ന ,
ഒരു ജനാവലിയില്‍ ഒരാളായി ..

കിനിഞ്ഞിറങ്ങിയ കണ്ണീര്‍ തുള്ളികളെ മറച്ചു പിടിക്കാന്‍ കഴിയാതെ ...!

മദീന ഒരു അനുഭവമാണെന്ന് ഞാന്‍ അറിഞ്ഞു...!!



മസ്ജിദ് നബവിയുടെ ഒരു ചിത്രം ... 



Thursday, April 3, 2014

ഖിബ്ലതൈൻ മസ്ജിദ് (മദീന 1)

മദീന .. 
യാത്രകളുടെ അവസാനം എത്തിപ്പെട്ടത് ഈ പുണ്യ ഭൂമികയിൽ .. കഴിഞ്ഞ ഒന്ന് രണ്ടു ആഴ്ചകളായി ഇതിലെ തലങ്ങും വിലങ്ങും നടക്കുന്നു.. ഓരോ കാല്പാടുകളും സൂക്ഷിച്ചു വെക്കുന്നു.. ഓരോ കാഴ്ചകളും മനസ്സില് ചേർത്ത് വെക്കുന്നു .. 

അങ്ങനെയുള്ള ചില നടത്തങ്ങൾ എന്റെ കയ്യിലെ പേപ്പറിൽ പകർന്നത്താൻ കഴിഞ്ഞപ്പോൾ ചെറിയൊരു കുറിപ്പും .. അങ്ങനെ..!!

ഖിബ്ലതൈൻ മസ്ജിദ് 



ചില യാത്രകൾ അവസാനിക്കുന്നിടത്താവും  ചരിത്രം അതിന്റെ യാത്ര ആരംഭിക്കുക . ഖിബ്ലതൈൻ മസ്ജിദ് തേടിയുള്ള യാത്രയിൽ അതെങ്ങനെയെന്നു ഞാൻ അറിഞ്ഞു . 

 ജോലി ചെയ്യുന്ന മദീന ഡെവലപ്പ് മെന്റ് അതോറിറ്റി യുടെ അല്പം മാറിയാണ് മസ്ജിദുൽ ഖിബ്ലാതൈൻ സ്ഥിതി ചെയ്യുന്നത് .. എന്ന്  വെച്ചാൽ സുൽത്താന റോഡിൽ മസ്ജിദ് നബവിയിൽ നിന്നും ഏകദേശം ഒരു  മൂന്നു മൂന്നര കിലോമീറ്റർ ദൂരം . 


രണ്ടു ഖിബ്ലകൾ ഉള്ള മസ്ജിദ് എന്നാ അർത്ഥമുള്ള ഖിബ്ലതൈൻ ബൈത്തുൽ മുഖദ്ദിസിൽ നിന്നും ഖിബ്ല ക'അബ യിലേക്ക്   മാറിയതിന്റെ  അടയാളങ്ങൾ അതിന്റെ ഹൃദയത്തിൽ കാത്തു വെച്ചിരുന്നു . 
റജബ് മാസത്തിലെ ഒരു നമസ്കാര സമയത്ത് മുഹമ്മദ്‌ നബി (സ) തങ്ങൾക്കു അള്ളാഹുവിൽ നിന്ന്   ഉത്തരവ് ലഭിക്കുകയാണ് ജെറുസലേമിലെ ബൈത്തുൽ  മുഖദ്ദിസിലെക്ക്  ഉള്ള ഖിബ്ല മക്കയിലെ  ഇബ്രാഹിം നബി ( അ ) യുടെ ക'അബ യിലേക്ക് ..

ഇസ്ലാമിന്റെ ആ സുപ്രധാനമായ മാറ്റം  സംഭവിച്ച അതെ ഇടത്തിൽ കാലു കുത്തിയപ്പോൾ  ഒരു പ്രത്യേക അനുഭൂതിയുടെ ലോകത്തിൽ എത്തി .. ഞാൻ ഒരു കാലഘട്ടത്തിന്റെ 
 പാദ  സ്പർശം ഞാൻ അറിഞ്ഞു ..

ഞാൻ പതിയെ അവയിലേക്കു അലിഞ്ഞു ചേർന്നു .. 








Thursday, December 5, 2013

ഒരു മൂന്നാർ യാത്രയുടെ ഓർമ്മ ചിത്രങ്ങൾ



ഒരു മൂന്നാർ യാത്രയുടെ ഓർമ്മ ചിത്രങ്ങൾ ..

പതിവ് വഴി വിട്ടു അല്പം മാറി യാത്ര ചെയ്തപ്പോൾ എത്തിയത് ഒരു മനോഹര ഭൂമികയിൽ ..


Kadalar Estate Munnar

എസ്റ്റേറ്റ്‌ റോഡിലെ ഏകാന്തതയിലേക്ക് എത്തിപ്പെടുമ്പോൾ മനസ്സ് ഒരുപാട് കാലങ്ങൾ പിറകോട്ട് ഓടി ..

ഒരു നല്ല കാലത്തിന്റെ സുഖമുള്ള തണുപ്പായി കാട്ടരുവിയിലെ വെള്ളം എന്റെ കാലുകളെ തഴുകി കടന്നുപോയി ..


Kadalar Estate Munnar

ഒരുപാട് കഥകൾ പറയാനുള്ള കടലാർ  എസ്റ്റേറ്റ്‌ ബംഗ്ലാവ് അന്ന് രാത്രി ഞങ്ങളെ നിശ്ശബ്ദം നിരീക്ഷിച്ചതാവാം .. പഴമയുടെ ഗന്ധമുള്ള ആ ഇടനാഴികൾ ഞങ്ങളുടെ ചലനങ്ങൾ അവയോടു കൂട്ടി ചേർക്കാൻ നോക്കിയതാവാം .. ആ രാത്രി ഉറക്കത്തെ ഞങ്ങളിലെക്കെത്തിക്കാതിരുന്നത് .. 
ഓർമകളുടെ കെട്ടുകൾ ലഹരിയായി നുരഞ്ഞും പുകഞ്ഞും  ഞങ്ങളുടെ സിരകളിൽ ആടി തിമർത്തു ..
മറക്കാനാവാത്ത ഓർമ്മകളുടെ ഒരു പുസ്തകമായി ആ രാത്രി അവടെ വശ്യ നൃത്തമാടി...

Kadalar Estate Munnar

യാത്രകൾ അവസാനിക്കുമ്പോൾ മംഗളം പാടിയ ദിവസങ്ങളുടെ നിഴൽച്ചുവട്ടിൽ   ഞങ്ങൾ കടലാർ എസ്റ്റേറ്റ്‌ വിട്ടു...

ഓർമ്മകളുടെ ഓർമ്മക്കായി ചിലവിട്ട രണ്ടു ദിവസങ്ങളുടെ നിറങ്ങളും പേറി ..!...


നന്ദി ..പ്രിയ സുഹൃത്തുക്കളെ ..!!